2Cor 12 | MCQ | STEP | 'Ene ta'arosaravujaho nijina kaivo ijaho ea mai'o pani'ajihuna. 'Enajihuna'e na iviamaa visonia 'ee Natohu ijara raka ka'ene veju'e samaa'e rejujihi 'waravuma.

2 Corinthians 12

Poru Oni Visoni 'Ee Raka Ka'ene Túna'i Rehunaka Nahajina

1 'Ene ta'arosaravujaho nijina kaivo ijaho ea mai'o pani'ajihuna. 'Enajihuna'e na iviamaa visonia 'ee Natohu ijara raka ka'ene veju'e samaa'e rejujihi 'waravuma. 2 Na Keriso oni ea pina hena kavura'e juara iropu ropu no'una no'o ijá pa'arena ijino vinaho hahiji'ina ho haha pa'ana puruva reniu kaivo Godira hena kamu. 'Enavo ea kajaho akúpa 'ahi ruha ka'ene no'upisu jihunijino apejume va'ana. 3 'Ene ijí ea kajaho huni hahiji'i va'ana 'aho huni 'avenijara va'ajaho na puruva reniu kaivo Godira Huhusu hena kamu. 4 Hu Parataisi va'ana. 'Ene ira ka'ene areri pa'warahunijija henana. Ijí vu'a kajaho ea areri pa'warahuna'e tanu'urahara. 5 Na ea ijá kajihi punijihuna'e mari'uhuna. 'Ene na nunijihuna'e pamari'uhuna kaivo nara pivujuri vajijino na mari'uhuna. 6 Ijihuna'e na ura temara'i 'ahi'amajaho na vwiha papuruva reti'ina'e re'eju. Ijihuna'e na nimaiji rone 'warahuna. 'Enakaivo na ijaho pa'warahuna. 'Ejakame ei pini iraka ka'ene nuni vaji kime 'ee nununa'i henujiru aromihuna. 7 'Ene uneunecha mapoka ka'ene vejume samaahirava ijihuna'e haha hiana ni'ina'e nuni haha vaja ranamana. Ijaho Setani oni ona'oji'inijina. Ijara 'wija oma rene nuni haha vaji hine ruarihakame na onuno pata'arosara'urono avanana. 8 Ikehuni vu'ijaho na 'aha no'upisu natohwiji jarime ijí 'eka ruva'amarono 'waravuta. 9 'Ejume Hu ijá 'wima Nuni maiji vwihanii'inijara venau'e a hu'úmo niareri renau. Ijihuni maijaho a harura pa'arenaujino Nuni harurijara venau'e a areri renauna 'wamana. 'Enajihuna'e na harura pa'areniujino mari'ume kehi kehi oju'ukame Keriso oni harurijaho nuni vaji namuna. 10 Ijihuni hahi Keriso onijihuna'e nara pivujuri vajijaho ira sisea 'warivura 'ee vea kisina vaji aruvura. 'Ene sisei 'ahie rurihuri vaja 'ee kisina rene puruva retiuni vaji na nijihuna'e teamanimuna. Ijihuna'e vea ka'ene na harura pa'areniujaho na harura renihuna.

Porura Koriniti Ora Vwihaniani Vu'ijina

11 Ja ojono veniume na vwiha pa'ana'e rejuta. 'Enajihuna'e jara asura vene na ea icha'inijaho rone 'warava'a. 12 Apasorua nimai jihipuni 'unamijija joni vaja masuani ajuarane vene najahajaho ikena. Acha ani ani'ina 'ee ea areri pavehunijija 'ee ea kime vwiha puruva retihunijija vene najahara. 13 Ijihuni maijaho na 'unama irakijino venaume ja sosia 'aho'i jihipuni hara'e rejare? Nara unenu'u pina ka'ene jonuna'a pavejujaho na ja ahija pamihuta. 'Enakúne nara sisea ka'ene vejujaho vwihanie areha. 14 'Ene na ivi'a 'aha no'upisu ijí ja vu'e ki'irono amairiaravu. 'Ene na paveje jonuna'a ahija renahuna. Ijihuni maijaho na joni kukuiji 'eka'irono avahuna pana kaivo ja 'eka'irono avaju. Ijihuna'e sesahwapo emahwa puni uneunecha patamuvanihura kaivo emahwapo sesahwa puna tamuvaniura. 15 'Ene na teamani'eju'e joni 'aveniji marani'avarono nuni uneunecha 'ee nuni haha maho'o ato'uruve pa'arehuna. Na niho'o oja ni'ima'ura'e mihu kaivo ja na oja ma'uako mihuna raka? 16 'Enakaivo areri ija'ina'e rehuna vo na pavejume jonuna'a ahija renahana. 'Ene na ea ka'ene 'unama ani ani'ini pisivisavi'ina 'wavura. 'Ene na ja papisimisamareno 'ekauta 'wahuna. 17 Na ea ka'ene irechamiume vu'ajihi puni vaji unenu'u pina mamaa jona'e na pa'ekahuna sa'ina'e 'ekuta raka? 18 'Ena na Taitasi 'ejahaume va'eme vweijaho ranavume hu hu'úmo vu'ana. 'Enakaivo Taitasiho jonuna'a unenu 'aho'a pa'ekahuna sa'inijaho 'ekana raka? 'Ú nú ja pu'úmo kara nikwinu rene vejara raka? 'Ene kara kwinu parene 'unama ura kwinu parene vejara raka? 19 Jara hine vwihana apene roujaho núra raka ka'ene 'waravujaho nú núni haha anakarame ijihuna'e 'waravu roju. 'Enakaivo nimaijaho Godoni una'i nú Keriso oni vaji ja oja mihujihuna'e ja vena'e marasahe 'uri'avarono 'waravu. 20 Ijihuna'e na vea ka'ene kú'o 'uname roujaho jara ichá'ina ka'ene rehuna'e na vwihajujaho parena vehunijara na oja hianimu. 'Ene nara ichá'ina ka'ene veje ja ura parenahuniji vwihaju. 'Ene joni vaja hine 'ura'aravu ho ea 'ahopuni kukui jihuna'e sename ajinavu ho ajiri pivaroramu ho 'ura'arame ninakaravu ho ea ira'atijino namahe 'wavu ho epuni vu'a sisea ronahu ho jarika reju ho 'ee uneunecha mai'o ura arini paname 'ee pareju. 21 'Ene vea ka'ene na kú'o joni vu'ujino nuni Godijara venie na joni una'i vahi'a apehunijara tea junimu. 'Eje na ja'amu vehuna. Ijihuni maijaho ea mapoka ka'ene itunavume nimako rene hine sisea ka'ene vena apene roe 'ee hine hurecharame 'uasa vejajaho mai'o pataarohe puni sisea vwihane arevi'ina.